2013年10月10日釣魚之行 總算達成目標

日期：2013年10月10日(四)，九月初六

地點：青山灣一帶

天氣：3級風

艇家：木根叔

釣手：小弟、Polo、老豆及老豆Friend

超過半年沒有釣魚，即刻變了生手及新手，早一晚連綁絲都雞手鴨腳。

由於星期一老豆出過青山灣，大風下都有幾條黃腳、牙點呔到，所以今日天氣更好，抱有些少期望，打算釣返幾條黃腳及青斑，作為掛拍前的最後一擊。

點之今日天氣真的很好，但魚訊卻強差人意。

第一釣點到步後根叔用幼絲中條牛廣仔，非常好飛。之後到我中條目標一號，磅頭黃腳，都係好好飛。但之後沒有魚訊，轉出些少，合共有7-8隻艇拍住釣，久不久只見那些艇上了幾條黃腳及星鱸，我們就沒有魚訊，過咗好耐老豆先中條倫仔。

轉位又轉位，各人都有少量魚起到，我就中了斤頭花或，都叫有少許力水，但其實超靜。

午飯過後，仍然冇太大轉變，直至一個海中心位，竟然中返3條黃腳、1牙點、2雙牙仔、1青斑B，總叫黃金20分鐘，之後又靜到冇人信。好快就夠鐘上岸分魚。

 

全日魚獲：雙牙斑X2(磅頭至斤頭)、黃腳X4(磅頭至斤頭)、花或X2(磅頭至斤頭)、牙點X2(磅頭至斤頭)、三牙或X1，牛廣X1、細倫X2(磅頭至斤頭)、魚仔十幾條，總魚獲都有10斤掛。

2013年3月18日釣魚之行 冇魚釣的日子 (發表於20130321)

日期：2013年3月1日(一)，二月初七

地點：青山灣一帶

天氣：2級風

艇家：木根叔

釣手：小弟、Polo、S小姐及老豆

天文台話全日陰天，間中有雨。結果全日冇風，一點雨也沒有，焗到出汗。

全日魚訊超少，有幾下立食餌，冇人中到。各人中雙牙仔，除咗我。

等又再等都冇魚食餌

唯有自己開餐

個人中過兩條魚，第一條鯊魚帶到船邊甩咗。第二條下午中條花鱸5斤左右，帶到魚邊冇人撈魚，最後甩埋。放生條魚等下次再釣返。條魚一D都唔惡，甩咗後在船邊仲要打個圈才say goodbye。

全日魚獲：雙牙斑X7(幾兩至磅頭)、磅頭油斑X1、花或X1、三牙或X1，總魚獲費事估。

2012年10月8日釣魚之行 專釣斑的日子 (發表於20121009)

日期：2012年10月8日(一)，八月二十三

地點：青山灣一帶

天氣：2至3級風

艇家：木根叔

釣手：小弟、Polo、S小姐及神秘先生

近期忙於準備旅行的事，沒有空間及金錢釣魚。原本今日可以同山歌仔釣多一次魚魚，但他有事，改為約佢老豆。

今日全日釣兩段時間，早上先由根叔呔3條魚開始(2花或1油斑)，S小組都有一條牙點。轉位小弟上一條青斑(大魚獎得咗)，Polo接力上又一條青斑。S小姐第一次學釣鈎頭，第一次落絲就中條青斑仔，真係無野講。跟住我上條油斑仔，又到S小組中魚，她話好大力，所以過去幫手，上魚入撈機一手包辦，又一條青斑。跟住小弟轉呔波子，打算呔立魚食，一落絲就中牙點仔，仲要根叔比根叔讚兩句，成個人飄飄然，所以之後冇魚食。

中午一大段時間冇魚食餌，有D人瞓咗。

下午根叔話流水OK，釣回早上位，釣咗唔知幾耐，Polo中魚，條魚好好力，我就取撈磯準備，眼見都上咗10手有多，都應該多條大魚。點知條魚發力還拖，走咗幾尺絲，停咗之後Polo拉緊魚絲，我同根叔見到都未出到聲，就應聲斷魚。呢種經驗我之前都試過，所以一見Polo的情況就知不妙。如果Polo上咗條魚，大魚獎就係佢。

隔咗一陣，大家希望條魚再返口，點知Polo又中魚，呢條上得好輕鬆，又上條青斑，我檢查吓個口，冇鈎確定唔係之前個條。之後全冇魚訊，只有鯊魚攪亂。

全日魚獲：青斑X5(斤頭至3斤)、斤頭油斑X2、斤頭花或X2、牙點仔X2(6兩)、仔幾條、鯊魚一條放生，都過15斤魚。

PS唔知點解今年好少魚仔呔到

2012年8月27日釣魚之行 晒到暈 (發表於20120828)

日期：2012年8月27日(一)，七月十一

地點：青山灣一帶

天氣：全日晒到暈，微風至2級風

艇家：木根叔

釣手：小弟、Polo、老豆及豪哥

今日差D冇魚釣，遊車河。根叔星期日找唔到我(完全找不到原因)，取消咗釣餌及打算出去修理隻船。感恩我食完早餐及買完糧水打算行出碼頭時，老豆見到根叔行過先知此事(我見唔到他)，即處理釣餌，根叔幫我哋找到大眼仔，我哋就自己找蝦仔。未釣魚未晒太陽已經要抹一把汗。

今日預咗太晒少魚，但早上真係好少，流緊及太晒D魚唔開口。只有根叔中條油斑，其他人中咗其條魚仔。

到咗中午時間一樣，不過多幾條魚仔釣到，上咗幾條花或，算做個個都有魚上。

食完午飯都如是，沒有氣色，個海一冇風就熱到想暈。完個消暑大西瓜後個人醒返。

下午轉流及轉位，終於有返幾吓可蒸的魚。根叔三條：牛秋、雙牙仔及青斑；豪哥波子用大眼仔呔條青斑，其他人有著落。收到走人去買咗D海鮮返去開餐。

全日魚獲：青斑X3 (幾兩至2斤幾)、油斑雙牙各一(斤頭)、牛秋X1(斤幾)、花或X4、馬友B X1、釘仔、或仔等共約10斤唔到。

2012年7月27日釣魚之行 雨點不停 (發表於20120728)

日期：2012年7月27日(五)，六月初九

地點：青山灣一帶

天氣：全日天陰落雨，2級風

艇家：山歌仔

釣手：小弟及2個好友

原本唔洗隔兩個月先有魚釣，但6月想出夜水一係天氣唔好、一係沒腳，唯有等埋D FRIEND放假先出。點之星期一打大風，星期二係釣期，與根叔商量後取消(唔取消都唔得啦，星期二都8號)。打算改星期五，點之冇期。感恩看到BLOG友出山歌仔2號艇，所以先知靚仔山仲有得出，約好山仔可以照出發。

今日冇流，之前打大風水濁及落大雨水淡，預咗唔好景。但星期三釣友們收獲甚豐，即時多咗期望。不過今日冇出現大豐收，但已經算很好，全船都冇隻龜。

山仔一早就通知我沒蝦仔，要去青蟲頭買，感恩今日女釣手出場，否則我們會只釣大眼仔，可能全軍覆沒。山仔話隻船好慢，們由於今日冇浪滑水，所以全日車船都順利。但全日落雨(除咗上岸前45分鐘)，好耐冇試過水戰，有些辛苦。

講返釣況，早上試釣大佬位冇動靜，轉咗好多排口都一樣，只有少量魚仔釣到。山仔不斷轉位，深水、淺水及寨邊位都冇。釣鉤頭的我連一下魚都冇。直至中午時轉去一個好少釣的位，先有好魚上到。Polo先來一條磅頭油斑，之後女釣友發功，上條斤頭青斑仔。之後Polo上條半斤裝芝麻，然後山仔起條油斑。跟住女釣手再發力，再上條斤頭青斑仔。到此為止，乘下龜龜的我點算，好在我都起返條青斑仔及花追(冇要放走咗)。以上6條斑20分鐘內全用蝦仔釣到，真少見。之後友靜下來。

下午返回屯門碼頭對開，打算上返條細倫，但冇。女釣手又發功，上條斤頭石蚌及小牙點，山仔及我都有小火點，其他仲少量雜魚。

今日女釣手最威，又走魚都要返幾條好嘢。

全日魚獲：青斑X3 (磅頭至斤頭)、油斑X2(磅頭)、芝麻X1(半斤)、火點牙點X3(4兩)、石蚌X1(斤頭)、釘仔、或仔、石九等共約6-7斤。

2012年5月21日釣魚之行 (發表於20120525)

日期：2012年5月21日(一)，閏四月初一地點：青山灣一帶

天氣：大部份時間陰天，部份時間有陽光，4-5級風

艇家：山歌仔

釣手：老豆、老豆friend、Polo及小弟

今次又係出唔成外海試吓釣深水，但回程知道早一日釣友出艇都冇咩魚獲。

近期天氣變化很大，早一星期都係吹東南，但到我們的釣期就改吹單東，D魚即刻收晒口，原本打算呔雙牙仔及牙點，點知結果不同。

今日都算大風，釣內堂都有4-5級風，如果出東澳桂山一定全濕。好耐冇釣港水，原本以為會有番D魚仔、油斑及牙點食餌，但今日D魚收晒口，就算用紅SO仔都唔得食。

第一寨釣淺水，冇魚食餌，釣咗一陣後出咗另一個排釣魚。呢個排深水少少(30尺內)，釣咗一陣山哥仔先聲奪人，上條大佬及雙牙仔，足見工架。由於今日坐位不同，沒有做魚僮撈魚。山哥仔自己一手包辦。之後到老豆個FRIEND，中條佬仔。好嘢，D魚開口，即刻改釣鉤頭。

過咗一陣，突然強烈的拉力拉下魚絲，完全不需抽魚已中魚，第一吓條魚轉頭以為是大佬，但之後條魚唔飛走而係不斷擺頭，山哥仔已經話係班，但條魚好有力，我完全不能起頭，而且大叫撈基。條魚不斷爭扎，其他高手叫我比少少條魚，唔好斷魚。其實條魚自己都拉咗我少少絲走，經過幾回合後，見條魚一唔擺頭，即刻收幾手，條魚冇咩還擊之力，再收幾手已KO入了撈基。原來係條青斑，終於知道釣淺水斑之威力。原來條魚唔係鈎嘴，而係同上次斷條斑一樣鈎口裡面。他們估計條斑過5斤，今次破咗個人青斑記錄。

好景不常要走鬼，等咗好耐先可以返頭先個位釣，但一吓都冇。真無耐。

下午轉位釣屯門對開，只有零星魚訊。老豆個FRIEND鈎蝦尾上青斑仔及幾條魚，我上條頭鱸仔，山哥仔釣紅魚及火點。全日也很靜，好少魚食餌。

頭鱸仔

影番張相做記錄，謝謝

全日魚獲：鱸魚X2(2斤及7斤)、青斑X2 (斤頭及6斤幾)、油斑X1(磅頭)、紅魚X1(斤頭)、火點X1(半斤)、頭鱸X2(6兩)、釘仔、牛秋、石九等共20斤有找幾斤。

青斑在勝記過磅做記錄，之後做了兩大碟餸。

PS：有D相會後補

2012年1月4日釣魚之行 (發表於20120107)

日期：2012年1月4日(三)

地點：青山灣一帶

天氣：全日冇陽光，有一陣雨，早上3-4級風，下午3級風

艇家：山歌仔

釣手：老豆、老豆friend 、Polo
及小弟
2012年第一次釣行，看見天氣預報與上次一樣，魚獲都已有心理準備。為免釣魚冷親，今次買了條雪褲保護下自己，感覺幾好，又保暖又防水。

 

原本打算今次取證後出去釣白立及花或，但因起風唯有釣內港。所以目標魚改為花鱸，要早少少出發。出門已感到寒冷，到屯門時仲凍多幾度，出海再減幾度，可能得返7-8度。

 

我哋先釣機場邊，到步後一隻釣艇都冇。風有時都幾大，落餌隻蝦會跳起，證明有魚，但唔開口。今日由山歌仔先起條鱸仔，再起條青斑仔，之後各人都有魚食餌，但都抽唔中魚，應該都係鱸鱸所為。我都有一下魚食餌，但抽慢咗，條魚送返隻蝦俾我，應該條大小小的鱸鱸。山歌仔之後中返條大d的鱸，要就魚，上水都唔錯，應該有4-5斤。

 

之後都冇驚喜，返回屯門那邊作釣。由於有座山擋風，暖返d。山歌仔先起條油斑仔，之後到我有魚食餌，而且一食就向下沉，知道係斑，條魚唔算大，初時我都話唔洗用撈基，但最後山歌仔都幫我一把。條魚都幾肥，幾靚仔，條絲頭2吋位花咗，如果用幼d已斷咗。

 

之後都只有零星魚訊，Polo上咗條牛秋，size ok。之後我都上條鱸B，條魚中咗都冇咩感覺，又唔走水又冇力，我仲疑惑係咩魚。今年鱸B大造，見釣友都起唔少。下午都一樣冷清，只有山歌子起多條鱸B及大牛秋。個海都有幾下立食餌，但冇人起到。最後由我老豆埋齋，鈎頭中肚起條疏蘿仔。

 

全日魚獲：鱸魚x5 (斤頭x4, 4-5斤x1)、磅頭油斑x1、青斑(磅頭x1, 2斤多x1)、牛鰍x2 (斤頭)，總魚獲約十幾斤。

2011年12月1日釣魚之行 (發表於20111202)

日期：2011年12月1日(四)

地點：青山灣一帶

天氣：早上間中有陽中，10時後多雲，全日大風5級

艇家：山歌仔

釣手：老豆、老豆friend x2
及小弟
仲然天氣轉變不定，但一星期前仍不斷留意天氣。起初預計星期五才返風，但最後的結果是星期四早上北風已到。一開始先釣深水位，非常大風，吹到人都癲。但最大條魚就係到起，不過是老豆個friend，不是我。他用小保羅起咗條5斤紅魚。以以為今日有d景，點知就得一下。釣咗n寨之後，為要避風就流，所以轉至山邊作戰。

一開始仲有少少太陽

過多陣就唔見咗
到步無耐，老豆中條青班仔，後來先知山歌仔都中條牙點，之後又係非常靜，連魚仔都無。

 

如是者直到食午飯前都冇魚食餌。又係魚唔開口，人都要開口，食醉雞翼、鴨腎、麵包，非常美味。食完因為流緊只可山邊作釣，都係無魚食餌，仲有個釣手要瞓覺。但山歌仔就起多兩點，話比我知個海有魚。其餘的人都有立食餌但抽唔中。

 

到2時左右，返回早上的釣點，都是冇魚食餌，唯有早少少走人。

大紅魚食保羅中的

全日釣獲，紅魚5斤x1、青斑斤頭x1、磅頭牙點x3，唔夠10斤，另加2隻龜。全日我最利害，連一口魚食餌都冇。

2011年11月7日釣魚之行 (發表於20111108)

日期：2011年11月7日(一)

地點：青山灣一帶

天氣：早上天晴3級風，中午後起風4-5級，天陰

艇家：山歌仔

釣手：老豆、老豆個friend、Polo
及小弟

時間過得很快，轉眼間又有得去釣魚。其實回想可以釣魚，真的有恩典。

 

昨晚天色已變，起風。但青山灣於大風下仍能作釣，如果好似老豆個friend原本出東水，就要取消。亦因為此，所以今次有4個釣手。

 

出門時天色很好，我仍想外出釣黃腳，但因釣魚証仍未到手，所以唯有按行程，釣青山灣。

 

今次天文台很準，早上很晒，中午過後起風，部份地方有落雨。講返釣魚過程，早上第一個排口沒有魚食餌，但之後就鯊魚大咬，不斷有鯊魚食餌，送咗好多蝦、鉤及絲給牠們。

 

我改用波子壓底，中咗或仔之後，收魚時鯊魚都追魚，甚至追到飛水。

估唔到用蝦仔都照中鯊魚仔。

D牙很利，有幾條斷絲收場，又或者要剪絲

如是者幾寨艇都只有中鯊魚，而我轉用波子後有幾條或仔釣到。心想今日應該不樂觀，但終於由山歌仔改變釣局，起條3斤多青斑提升士氣。之後由我老豆起條接近size的青斑，到山歌仔再起條油斑仔。

 

當山歌仔起條青斑後，我就轉釣鉤頭。今次到我有魚食餌，條魚一食餌就向下走頭，由於上次付出的經驗，所以我立即起身收魚，知道條魚都有d斤兩，所以當問要唔要撈機時，我當然回應要啦。條魚中途都有幾下發出，要定下絲再收。上水又是接近size的青斑，yeah。

 

在轉位前由Polo起條舊水牙點，總算人人有魚分。

 

轉位後天氣開始轉變，起大風及天陰。但下午時間除山歌仔起及老豆起將條或仔外，就只有起鯊魚。直致最後釣點Polo又起返條青斑仔收工。

呢條大d，全日起碼有斤30口鯊魚食餌。

全日魚獲：青斑X4 (磅頭至3斤半)、斤頭油斑一條、斤多牙點一條、半斤花或X1、或仔X 10幾、釘釘X1，總數不足十五斤

2011年10月24日釣魚之行 (發表於20111025)

日期：2011年10月24日(一)

地點：青山灣一帶

天氣：全日炎熱，2至3級風

艇家：山歌仔

釣手：老豆、Polo及小弟

 

去完台灣6天625自駕之旅，有一天時間休息回一回氣。今次出發釣魚前只睡了約5個小時，下午及回程時都好眼瞓。

 

由於釣手不足及收風外海不多黃腳食餌，所以今次只釣內海。用山歌仔的話，今日貴精不貴多。

 

上午魚獲不多，只有2條牙點及1條3斤及2條斤頭青斑，其餘只有少量雜魚及引咗一隻魷仔上來。天文台又放流料，如果冇帶超，全日晒到眼都開唔到。

 

下午係今日重頭氣，先由老豆起條青頭仔，跟住到我有魚食餌，條魚d力好勁，但由於經驗不足，同條魚頂得太行，結果收咗3手斷絲收場。我同山歌仔正做檢討及估計係大紅鮋之際，到Polo有大魚食餌，我老豆見狀，叫Polo過手，我就接過絲﹝其實有點唔好意思，哈哈其實應該由我老豆接手先對，但我就...﹞。接手後發覺條魚都唔算太力，可能由於絲粗，都唔使就條魚，但條魚都有幾下發頭力。當條魚上到水面時先知大野，但我同老豆配合唔到，老豆撈了幾次都不成功，條魚向船尾方向衝，於是我自己拿過撈機，一手帶住條魚，一手撈魚，感謝主都上到條魚，非常興奮。現在回想都有點驚，分分鐘條魚發力又再斷絲收場。 

條魚上水後有驚人發現，如來條魚個嘴有2個鈎，個鈎就係我斷的那個。條魚唔識死，返口食餌，結果就......。今次有大斑食，回家後過磅不夠5斤。

影張靚相留念

轉位後又到Polo又發威，阿山知道係大紅鮋，今次見Polo應該應付到，就由他自行收絲，我就取撈機準備，見魚就撈上來。絛魚過磅後有3斤，起初以為條魚係放生魚，但回家後條魚轉紅，所以老豆話應該係海魚。之後Polo仲鈎番我老豆個斷咗個舵上來，真勁。

去到後一個位到我發力，捉係蝦時有條青頭仔自投羅網，之後仲上多條針墨仔收工。

 

今日總魚獲：青珪6條﹝磅頭至約5斤﹞，牙點2條﹝磅頭至斤多﹞，紅鮋一條﹝3斤﹞，或仔及釘釘少許，仲有針墨一隻，水筒仔一隻及大老虎一條，共約17-18斤。