2011年2月21日之釣行 (發表於20110222)

日期：2月21日(一)

天氣：3-4級風，多雲

地點：西水一帶

釣手：豪哥、老豆、大俠、小弟

艇家：山歌仔

魚獲：lo lo x 13(斤幾至13斤)、青斑x1(斤半)、或仔x10幾20條(幾兩)、釘釘x2，估計共約1擔上下(可能要減d)

近期好忙，真係好想有得放鬆下，3月頭去旅行，當然非常期待，可以陽光與海灘，當然仲有2個人唔需要理工作之事，可以盡情hea。但除此之外，釣魚亦係我的重要解壓方法，可以與大自然親近，又可以傾下計，有魚釣時刺激非常，但會引致另一個問題，就係中毒。

都唔記得今次係幾時約艇，但期實已有超過2個半月沒有釣魚，一來是忙，二來又冇假，三來Polo又唔得閒，但期實仲有一個原因，就係怕凍。

早一個星期天氣預報都好天，仲要算暖，但今日天陰，但感恩唔大風，上午只有一場小雨，車船時都凍，但因有準備，所以還可以。

車船時隨影一

隨影二

隨影三，今日唔算好大浪

今日目標魚(白立)釣唔到，知道原來要去好遠先有得釣。今日全日大部份時間都好疏口，水都幾凍，連或仔同石釘都好少，下午時間平均全船三個字先上一條。上網睇d魚友上澳頭爆釣花或，一隻船有60-70斤(或及立)。但唔好睇今日d魚數量少，但其實今早有黃金一小時，釣14條魚有成擔重，有部份仲要放係冰箱至得。

生倉滿溢

終於要講戲肉，今早一路車船，發現d水真係好差，又黃又濁，到咗桂山先好轉。去到釣點都冇魚食餌，仲要落小雨(只有一場)。釣咗一段時間後，山歌仔轉位，去到初時我仲想釣波子壓底，但山歌仔叫我轉釣鈎頭，令我有一次難忘之旅，亦連破我釣鈎頭的記錄。山歌仔都係釣到最多，而且多得他及老豆提點、豪哥借出工具才可以有此經驗。今日有四口鱸魚食我魚餌，第一口唔夠經驗，而且用左手拿絲，又估唔鱸魚食餌如此強勁，仲要沒有大手揪魚，結果收咗幾手就甩咗。

好快手換隻蝦放落水，換回右手，一到底收一手絲，就feel到隻蝦跳，跟住條魚食餌，食餌強勁，而且魚非常好力，由於我用12號主(唔知幾多號腳，係用豪哥的)，都可以上到水，我估條魚有6-8斤。

接住再落蝦，過咗唔係好耐，就有魚食餌，同第一條一樣，都係一樣好大口食餌，而且今次條魚仲好力，走水時燒晒手，仲令我見紅(宜家仲疼)。第二條同第一條差唔多大。

由於見紅，所以即刻取指套用，之前冇用到仲要冇用膠布。但原來發現d平價指套唔好用，釣完第三條魚就報銷了。第三條係最好力的一條，條魚非常好力，走水強勁，段段有力，放都放唔切，上咗水面三次，到第三次才上到魚，但反而條魚size係細d，約4-5斤。釣魚三條之後即刻手震，仲要被山歌仔發現。

黃金一小時好快過去，一小時內上咗13條鱸魚及一條青斑，最利害時有3位同時食餌，因條絲重疊，仲要同山歌仔現換絲，全艇斷一口，甩咗2-3口，我見到另一隻艇同時4個人食餌，上3條斷一條，連我老豆都話釣回頭鱸少見。

全船魚獲

青斑仔

今次又令我多咗小小經驗，好開心要感恩。晚上食魚食到非常飽。