2010年9月20日釣魚之行 (發表於20100921)

日期：9月20日(一)

天氣：5-6級風、早上天晴及下午開始有雨及大雨，大生流

釣手：小弟、老豆

艇家：山歌仔

釣點：西水青山灣一帶

魚獲：斤頭青斑x2、牙點x8(6兩至一斤)、火點x7(6-8兩)、花滑x4(12兩至斤頭)、石或x1、牛秋x1、雙牙Bx2、釘釘雜魚幾條，共約13-14斤。

今次釣魚真係面對重重事件，先是釣手由3人增至5人，最後減至2人，接著打風，但感恩仍然有魚釣，而且早上6小時沒有雨，仲要上岸後先落大雨，雖然一樣濕了大半個人，但已經知道恩典無限。

出發前已經問艇家打風可否出艇，艇家話釣內灣冇問題，只要預咗落雨，那麼當然照出發。但今次個friend前一晚突然有事，小弟身負重任，要釣埋他的一份，雖然我不能如願，但最少幫他釣了一條斑仔，叫做有少少交代，重任最終當然由艇家做埋。

由於攝影師不在，要自己出手

出艇時間中有陽光

 仲要因空氣差，四周景色不清

今次知道個風向由東向西吹，所以爭取時間7點半落艇，第一個釣點又係艇家中魚，有大花或釣到，他個人連起3條，我哋全用大蝦作釣，但因未適應大風及水深關係，送咗2隻蝦比的魚，我見不對路所以轉用蝦仔，結果先起一條點點，之後中條有力的既魚，由於絲較幼，所以要同條魚玩了一陣，上水原來係花或一條，size唔錯。

花或，最大個條過斤

之後轉位，有d點點釣到，但全數由蝦仔釣到，艇家用鉤頭蝦仔，我就鉤背。我聽電話時，放絲落海，由於聽完後要放好電話(怕整濕)，但突然個魚排被拖至地下，初時以為鈎石，但提起魚絲時發現有魚，仲要重重地的感覺，上水前怕走魚(上一次經驗)，於是叫撈箕，原來是青斑仔一條，山歌仔仲話係咪同條魚通完電話。

好靘既斤頭青斑仔

上面牙點，下面火點

牙點

火點

今次個人收獲較上次好，有一條上咗一半既斤頭牙點走咗(我自己估計)，只係今次好似唔識鈎大蝦，甩咗幾隻，又要再補課先得。

全部魚獲 

今次好開心，有魚釣，3個人傾下講下，吹吹海風(艇家話前一日冇風，汗流不停)，點半後先開始落雨，感謝主。

已經約好下次出發，會有一位新手加入。