2010年12月2日之釣行 (發表於20101204)

2010年12月2日之釣行

日期：12月2日(四)

天氣：3-4級風

地點：西水一帶

釣手：豪哥、老豆、Polo、小弟

艇家：山歌仔

 

魚獲：油斑x4(斤幾至3斤幾)、黑沙x1(斤幾)、或仔x30幾(幾兩)、釘釘x10幾、牛秋x1、雜魚幾條，共約20斤上下

 

感謝主全年目標今日達成，每月最少釣一次魚。今年最後兩次都返東澳一帶，船程較長，回程感覺較辛苦。今次原本想早睡一點，養足精神，但瞓到3點多被弄醒，再也不能好好入睡，只瞓咗3個幾鐘。

 

一早到三聖食早餐，今日不知原因，全日很快肚餓。我地中途試一個釣點，艇家只上了一條牛秋，其他人冇食餌，跟住直出目的地。一到釣點，艇家很快中魚，上到一望是少見的大條油斑，接著到豪哥發威，連上2條。由於早前上了爛網，到我感覺重時抽起魚絲，初時都以為係垃圾，但艇家問係咪魚，我都不清楚，上了多手後，魚才有少許擺動，我才回應係魚。由於我用5號絲所以不敢大手起魚，但當魚發力時我就向下一下，幾位老手吩吋唔好，以免爆咀走魚(有了今次經驗下次唔敢，如果唔係又比人話)，終於都起到條魚，非常開心，暫時用蝦仔釣到的最大一條斑。
 

由老豆幫手，將魚入網

拍張靚相

4條魚上後就走位，有魚壓倉，壓力少了。原本想釣多D魚仔玩，但今日好疏口，午後才有較多或仔食餌，就在釣或仔時，突然有一下重力向下拉，我一抽中魚，但不能收絲，只能定住魚絲，艇家問係咪魚？我答，係。當條魚不動時我向上抽，但條魚發力向下，即時斷絲，全個過程只有10多秒，5號絲完全不能還手，我估應該係斑。
 
之後走幾個位都冇咩魚食餌，但中途見到幾條白海豚，很開心。到最後一個釣點，有好多人磯釣，他們打引餌幫到我們，豪哥又再發威，中條斤幾黑沙。但只有一條，之後回程走人。

4喜班

全日魚獲

今日都幾累，但好開心，透過觀察高手又學到好多野，而且又斷魚又起條斑，正呀。

我都好想釣白立及鱸魚，但現在仍未見影。