2011年7月25日釣魚之行 (發表於20110730)

日期：2011年7月25日(一)

天氣：非常熱, 非常晒, 2級風

釣點：青山灣

艇家：山歌仔阿爸---根叔

釣手：老豆, Polo, 師傅, 小弟

近期經常一個字掛口，就係忙。終於要準備搬office，又要準備還原工程、又要準備裝修、仲要有嘉年華會....................想放假都唔敢。

今次有新嘗試，出發前一日轉咗個艇家。

話說我星期日午睡中收到電話，由於已飛咗線唔知邊個。一聽原來係山歌仔，他說部車有事不能出艇，他阿爸有期由他代上。收線後才清醒，原來冇根叔電話，要再問山歌仔。因此今天出根叔艇。

從天氣預告已知今日會很熱，所以提早出艇。今日流水一般再加上太晒，所以預咗d魚唔多口，結果一如所料，全日不太多魚上水。

早一晚唔知點解全身好熱，不能入睡。再加上老婆入camp，所以要一早起身負責招呼兩隻寶貝，先可以再出發。出門望個天已知一定會熱死，但感恩原本天文台預計微風，但結果全日都有d風，不至中暑。

天朗氣清，連雲都冇

我們全日只釣兩個位，第一個位有牙點食餌，size唔大。但唔知原因自己起唔到魚，要用好耐時間才有魚上，成為最後一個上魚的人。當上魚後開始好轉，起返多好多條。

我第一條起到的牙點B，非常細條

Polo釣到今日一，大黃釘一條

師傅釣到細鱗及沙鯭仔

由於天氣熱，老豆買咗兩個西瓜解暑，謝謝。但太好食，冇影相。

下午起咗2條巨鑽，好開心，好耐無上過那麼大的鑽鑽。下午都有d大石九、或仔、牙點等釣到。

全日魚獲：牙點仔x18(4-6兩)、火點仔x1(5兩)、火車頭x1(半斤)、牛秋x2、巨鑽x2、石九x9、石釘、或仔、花頭梅、生鯭仔等，當10斤魚